Psalms 25
Hosu kava'ae'mo agesa afino'ae'mo nunumu hu'niya gemae
1O Ala kava nene, hu'na, kagaefeke'mo nunumu nehu'nae'mo nagupi mafa'nemo ali'na asaga nehuve. 2O Goti'nimogae, hu'na, naha maegane, hu'na nagesamo afi'nova'mofe'mo fiku yanage'a kame vaya'nimogi ae'a nagasesageno navagage hugiyanagi o'natalo. 3He, muki vaya'mogimo kagava ne'maiya vaya'mo hapa maegeno'ao apavagage osino. Apakaetegamo mago hosu kava'mo osu'naya'monanafa fiku hosu kava'mo nehaya vaya'mo hapa o'maeka afa'a apatalegeno'ao apavagage hino.4O Ala kava nene, hu'na, kahau'ninageka visuva ka'mo nave liyo. Ani kate'mo visuvafe'mo alika naya malo. 5Nagufamo alika katika ne'natana Gotigamo mai'nana'mofe'mo lama gekamo akame hisuvafe'mo alika naya malo. Muki afina'ae'mo kagava ne'mauve.
6O Ala kava nene, hu'na, akeya'vilagati'mo alagepa huka kahau huka apatege kahau kayamopafi'mo kahauge huka ne'maina kavafe'mo kagesamo afiyo. 7Neya vekamo mai'ne'nae'mo hosu kava'mo huge gekamo ago amagi'na atalege hu'nova kavafe'mo kagesamo o'afiyo. O Ala kava nene, hu'na, kahau huka apatege alagepa huka hapa maege huka mai'nekae'mo nagaefe'mo kagesamo afiyo.
8Ala kava ne'mo alagepa fatago vekamo mai'niya'mofe'mo hosu vaya'mogi alagepa kate'mo visayafe'mo alino apaya malegaiye. 9Agaemo fatago kava'aleti'mo yagu yaga kava'mo nehaya vaya'mo alino ho huno ne'apate. Agaemo yagu yaga kava'mo nehaya vaya'mo ka'amo alino apave ligiye. 10Agaemo kotalakemo hu male'niya ge'amo akame huge avayafati'mo hu'niya ge'amo afige hu'a mai'naya vaya'mo hau huno ne'apateya kate'e ge'amo akame nehiya kate'e'mo apavalelino ne'viye. 11O Ala kava nene, hu'na, ala kagikalefe'mo hosu kava'nimo alika atalo. Asole hosu kava'mo hu'nova'mofe'mo alika atalo.
12Ala kava nefeke'mo koli nehaya vaya'mo ina lagimo mai'nae. Ala kava ne'mo'a afa'a alino apaya malesige'a alagepa kate'mo ugae. 13Apakaemo alagepa hu'a maisage'a apakinago vaya'mogi ma mopamo aligae. 14Ala kava ne'mo'a agaefe'mo koli nehaya vaya'mo alino fala ki male'niya ge'amo hapa paigiye. Hapa paiteno kotalake hu male'niya gemo aepa'amo alino apave ligiye. 15Agaemo natafauno nate'niya umenifati'mo hatu maeno nategaiya'mofe'mo Ala kava nefeke'mo aulu he'na ne'agove.
16Nagaemo nagai'nige'mo magoke'age'mo mai'ne'na kana ya'mo ali'nova'mofe'mo aika afe leka nagaemo nageteka kahau huka nato. 17Naipafi'mo hane'niya kana ya'nimo'a lusi kava huno kositeno afole ai'niyanagi hanageke yapati'mo nagufamo alika katika nato. 18Kana ya'mo alige nagafu kige hu'na mai'nisugeka nagetekae'mo muki hosu kava'nimo alika atalo. 19Kame vaya'nimo asole vaya'mo mai'naya'mofe'mo apakaefe'mo kagesamo afiyo. Apakaemo nagaefe'mo alagi ohapau'nige'a apaini hu'a ne'natae. 20Nagupi mafa'nele'mo yagaika ate'neka hosu kavategati'mo navalelika uka naote nato. Nagaemo kagaefeke'mo, naha maegane, hu'na nagesamo afite'na mai'nova'mofe'mo navagage osino. 21Nagaemo kagava mai'nova'mofe'mo naha maege'nao lama ge hu'na fatago kavakamo akame hute'na alagepa kava'mo hu'na maino.
22O Gotiyo, hu'na kagaemo Isaleli vaya'mo hanageke yapi'mo mai'nagi miya faika hatu maeka apato.
Copyright information for
KYG